Igiterwa kivura indwara nyinshi kigiye gukwiragizwa mu Burundi

Mu Burundi hagiye gukwiragizwa igiterwa ngirakamaro ku magara y’abantu citwa Stévia kivura ndwara zitari nke. Biramaze kuboneka ko gishobora kurimwa kw’isi yo mu Burundi.

Kabwa Charles yazanye igiterwa Stevia mu Burundi

Kabwa Charles, ni umurundi aba mu gihugu c’Ububirigi iyo igiterwa Stevia caje kiva. Charles avuga ko kimaze imyaka irenga 20 kimenyekanye mu bihugu vya Buraya no mu gihugu ca Afrika y’epfo kimaze imyaka 5 kirimwa. Kabwa ati :"stevia ni igiterwa c’igitangaro". Ivyo abivuga afatiye ku kamaro ntangere stevia gifitiye amagara y’abantu mu kuvura indwara zitari nke

Stévia ni igiterwa gisa n’urwatsi rutoto, gitewe ahantu hameze neza, kirakura kigashikana imetero hafi 2 z’uburebure. Amababi yaco matoto arasosa kurya kw’isukari. Ico giterwa kimara imyaka 4 kikamurwa incuro 3 ku mwaka. Amababi yaco barayanikira akavamwo isukari yitwa «Steviacide» ivura indwara z’umutima, z’igisukari, za Cancer, ivumbuka ry’imirindi y’amaraso, indwara z ’amenyo, ubuvyibuhe burenze «obésité» eka n’izindi nyinshi. Mu bihugu bamaze kwijukira Stevia, bagikoramwo inzoga «bières» n’imitobe «limonades» ata ngaruka mbi zifise ku magara y’abantu.

Nk’uko Kabwa abandanya abimenyesha, ivyigwa vyarakozwe aho ivu ryo mu ntara zose hamwe n’amazi yo mu Burundi vyagiye kugirwako ivyirwa muri za kaminuza zo mu Bubirigi, basanze ico giterwa giishobora kuba mu Burundi. Umurima wo gufatirako ungana ihegitari «1 hectare» uriko urakurikiranwa mu ntara ya Mwaro.

Iciyumviro co kuzana ico giterwa mu Burundi caje mu ntumbero y ogufasha Abarundi kurwanya za ndwara twadondaguye, hamwe n’ugufasha kwiteza imbere kuko kizoshorwa mu makungu. Ivyo bikavurwa na Kabwa Charles.
Charles arangiza avuga ko inyuma y’ivyirwa vyakorewe muri kaminuza y’uburundi mu gisata c’uburimyi, ico giterwa kigiye gukwiragizwa mu ntara zose z’Uburundi.