Accueil > Kwidagadura > Mumakungu > Pharell Williams na Robin Thicke bahanywe kubera biganye indirimbo ya (...)
Pharell Williams na Robin Thicke bahanywe kubera biganye indirimbo ya Marvin Gaye
mercredi 11 Ntwarante 2015
Ibihagange bikomeye mu muziki muri Reta zunze ubumwe z’Amerika, Pharell Williams na Robin Thicke baciriwe imiriyoni 7,4 z’amadorari y’Amerika kubera biganye indirimbo ya Marvin Gaye.
Urubanza rwahujije umuryango wa Marvin Gaye hamwe n’abaririmvyi bakomeye Pharell Williams na Robin Thicke, rwagiye kurangira abo baririmvyi baciriwe imiriyoni 7,4 z’amadorari y’abanyamerika azohabwa umuryango w’umuhisi Marvin Gaye.
Uwo muryango w’umuhisi Marvin Gaye witwariye abo baririmvyi, babagiriza kwigana indirimbo "Got to give it up" ya Marvin Gaye.
Sentare ya Los Angeles barumvirije izo ndirimbo kugire bumve ko izo ndirimbo zifise imidiho imwe hamwe n’amajambo. Iyo sentare yasanze vy’ukuri amajambo n’umudiho biri mu ndirimbo "Blurred Lines" ya Pharell Williams na Robin Thicke, babikuye mu ndirimbo "Got to give it up" ya Marvin Gaye yasohotse mu mwaka w’1977.
Abo baririmvyi baciye bagirizwa n’iyo sentare guhonyanga agateka k’abanyamwuga (droit d’auteur) mbere bacirwa gutanga amafaranga angana n’imiriyoni 7,4 z’amadorari y’abanyamerika.
Umuryango w’umuhisi Marvin Gaye barabajwe bikomeye n’ivyo abo baririmvyi bakoze.
Mwomenya ko indirimbo "Blurred Lines" ya Pharell Williams na Robin Thicke ari indirimbo yakunzwe cane mbere abo baririmvyi bakaba baronse imiriyoni 5 z’amadorari zirenga umwe wese kuva iyo ndirimbo isohotse.
Raba indirimbo "Got to give it up" ya Marvin Gaye
Raba indirimbo "Blurred Lines" ya Pharell Williams na Robin Thicke
Lorene Nubwabo
