Ruyigi : Umwimbu w’ibiharage ntiwifashe neza

Umwimbu w’ibiterwa wifashe neza mu ntara ya Ruyigi, havuyemwo ibiharage gusa, kuko ari vyo bitagenze neza bivanye n’ihinduka ry’ibirere.

Ku bw’umuyobozi w’uburimyi n’ubworozi muri iyo ntara ya Ruyigi Festus Ntihabose avuga ko, icatumye ibiharage bigabanuka umwimbu, ari ibirere vyahindutse, Abandanya avuga ko ibindi biribwa vyifashe neza, ndetse no kw’isoko vyaragabanutse ibiciro. Aha, agatanga akarorero k’intete z’ibigori, aho ikiro cavuye ku mafaranga 650, kija ku mafaranga 350. Asaba ariko abarimyi kubungabunga neza umwimbu, mu ntumbero yo kurwanya ikigoyi. Ivyo akaba yabishikirije, mu gihe kenshi na kenshi bishika aho abarimyi bimbuye baca bahereza umwimbu wabo mw’isoko, haca kabiri ikigoyi kigaca kibatera.

Mu kamenya ko amatohoza yakozwe muri iyo ntara ya Ruyigi, yerekana ko umukenyezi mwirimizi yicwa n’ibikorwa wenyene, aho igice kinini c’abagabo kiterekwa isuka, bakagirizwa guhereza akanya kabo mu mazu y’ubudandaji bw’inzoga, umugore ariko ararima wenyene.