Accueil > Amakuru > Utuntu n’utundi > Ubugeni bw’abasangiye ibitsina bwemerewe mu Bufaransa
Ubugeni bw’abasangiye ibitsina bwemerewe mu Bufaransa
jeudi 25 Ndamukiza 2013
Mu gihugu c’Ubufaransa baraye bemeje itegeko riha uburenganjira abasangiye ibitsina kwubakana, inyuma y’impari nyinshi zari zimaze imisi hagati y’abatumva kumwe ico kibazo muri ico gihugu, harimwo na ekreziya gaturika yari yavyamiriye kure. Abashingamateka 225 nibo baritoye kuri 331 baryanse.
Biteguwe ko François Hollande, umukuru w’igihugu c’Ubufaransa, atera umukono mu misi ya vuba kuri iryo tegeko ryaraye ritowe, gutyo abasangiye ibitsina bace batangura kwubakana icese, mu ntango z’ukwezi kwa Ruheshi, umwaka w’2013.
Naho biri uko, abadashigikiye iryo tegeko bamenyesha ko badacitse inkokora, ko bazobandanya gusaba ko iryo tegeko ryohagarikwa. Bavuga ko imyiyerekano yari iteguwe ku genekerezo rya 26 Ruheshi 2013 izohaba kandi ko izokwitabwa n’abantu barenga umuliyoni.
Christian Jacob, umukuru w’umurwi w’abashingamateka bo muri UMP, yariyamirije iryo tegeko ryemejwe na bagenzi web o mu nama nshingamateka, aho yagaragaje ko iryo tegeko rije kubuza umugabo kuba umugabo, n’umugore kugumana akaranga kiwe k’umugore. Bompi batakaje izina ryo kwitwa umwe serugo, uwundi inarugo. Nico catumye abo batabishigikiye bitura Sentare yubahiriza ibwirizwa shingiro. Abahinga bakaba bahebuza abo bamirira kure iryo tegeko ko amahirwe ari make.
Twobamenyesha ko igihugu c’Ubufaransa kigize ica gatatu i Buraya n’143 kw’isi yose, mu kwemera ubugeni bw’abasangiye ibitsina.
Egide Nduwimana
