Ubuhindi: Umusore yahebwe n’uwo bagomba bubabakane kuko ananiwe 15+6 ico bitanga

Mu gihugu c’Ubuhindi hari umugeni yahagaritse ubukwe bwiwe bitewe n’uko umugabo wiwe atamashure afise.

Igiporisi mu Buraruko bw’Ubuhindi kivuga ko umugeni yavuye mu bukwe arigira, bitewe n’uko umugabo wiwe yananiwe ibiharuro(Guharura bisanzwe). Uwo mugeni yamubajije cumi na gatanu guteranya gatandatu, ico bitanga. Umugabo atanze inyishu itariyo mu kuvuga ati: indwi, umugeni yaciye ahagarika ubukwe avuga ko bigaragara neza ko uwo musore ata mashure afise.

Igiporisi mu ntara ya Uttar Pradesh, aho ubwo bukwe bwariko burabera, kivuga ko cafashije kugira utuganuke hamwe n’ibindi vyose vyari vyatanzwe, bisubizwe.
Mu kwezi guheze, ubundi bukwe mu Buhindi bwavugishije benshi aho umugeni yubakanye n’umutumire mu bukwe, bitewe n’uko uwo bari kwubakana yafashwe n’intandara.