Ubushikiranganji bw’amagara y’abantu bwatanguye ibikorwa vyo gupompa ibisigarira vy’isoko

Inyuma y’indwi iheze isoko nkuru ya Bujumbura ihiye igatokombera ,ubushikiranganji bw’amagara y’abantu no kugwanya Sida bufadikanije n’umuryango utabara imbabare Croix Rouge baratanguye ibikorwa vyo gupompa ahahoze isoko mu ntumbero yo gukinga indwara zishobora kwaduka kubera ivyahiriye muri ico kibanza.

Ku munsi wa gatandatu igenekerezo rya 2 Ruhuhuma , 2013 niho hatangura ibikorwa vyo gupompa ibisigarira vy’isoko nkuru ya Bujumbura kugirango umunuko w’ibisigarira ugabanuke kandi bakinge indwara zishobora kwaduka kuko hahiriye ibintu vyishi harimwo n’ibishobora gutera indwara abantu. Umuti bakoresha mu gupompa ukaba wica imigera y’indwara.

Dionisis Niyonizigiye, umunyamabanga ntayegayezwa mu bushikiranganji bw’amagara y’abantu no kugwanya sida akaba yamenyesheje ko ivyo bikorwa vyo gupompa bidakingira abarengana iruhande y’isoko gusa, ariko ngo bakingira n’ abasanzwe baba canke bakorera hafi yaho, ndetse n’abazo tegura ico kibanza imbere yuko batangura ibikorwa vyo gusubiramwo isoko.

Umuryango utabara imbabare Croix Rouge ukaba wiyemeje kubandanya ukorana n’ubushikiranganji miri ico gikorwa. Abantu bagera kuri 60 akaba aribo bariko bakora ico gikorwa kandi ngo bazo bandanbya.