Ubushikiranganji bw’amagara y’abantu burabeshuza Ebola mu Rumonge

Haciye iminsi bivugwa ko hoba hari umurwayi wa Ebola yabonetse mu ntara ya Rumonge. Ubushikiranganji bw’amagara y’abantu, buserukiwe n’umuyobozi mukuru wabwo, burabeshuza iyo nkuru.

Umuyobozi mukuru muri ubwo bushikiranganji akavuga ko uwo muntu yiketsweko iyo ndwara asanzwe agira ingendo mu Burundi no muri Repuburika iharanira intwaro rusangi ya Congo (RDC), ko yasuzumwe n’abajejwe amagara y’abantu mu Burundi, ariko ibipimo vyerekanye ko uwo muntu ata kimenyetso na kimwe c’indwara ya Ebola afise.

Tubibutse ko ikiza ca Ebola kimaze guhitana abarenga ibihumbi bitatu muri Afrika y’uburengero. Muri Republika iharanira intwaro rusangi ya Congo, Ebola imaze guhitana abashika kuri mirongo ine.