Burundi : Abarundi basabwa kwijukira kurima kijambere

Ukurima kijambere birafasha mu butunzi bw’umuryango, ndetse bigatuma ivyimburwa vyiwe bisahiriza mu bindi bikorwa, bikagabanya kwama umuntu yitwararika iyo azokura amafaranga yo guhemba abamukoreye, canke amafaranga y’umwavu. Ivyo bikaba bimenyeshwa na Anicet Ndoricimpa, umurimyi mworozi wo mu ntara ya Kayanza.

Ndoricimpa yarijukiye cane kurima kijambere n’ukworora. Afise umurima w’ibitoke, aho igitoke kimwe gusa gishobora gupima ibiro bigera kuri 50. Ivyo akavuga ko bimufasha, na rirya bimwe aca abishoba, amafaranga avuyemwo agahemba abakozi bamufasha gutunganya indaro y’ibitungwa, ayandi nayo agahemba abakora mu mirima, mu giheibindi nawe abifungura n’umuryango wiwe.

Ndoricimpa abandanya avuga ko ata n’ingorane y’umwavu agira, kuko awukura mu bitungwa vyiwe. Akaba yoroye ingurube, inka n’inkoko. Uyo murimyi mworozi, akaba ahanura abandi barimyi bo mu Burundi, kwijukira kurima no kworora kijambere, kuko bitunga umuryango, bikagabanya ubukene bwugarije imwe mu miryango, bakareka kwama bitwararika imbuto za kera canke zitarobanuye.