Ukwigumizamwo ivyababaje umutima bitera indwara umubiri

Kubura akayabagu n’itiro, kumeneka umutwe, gukangagurika canke kugangabuka mw’itiro, kugira imisonga ikomeye mu mubiri, kuribwa mu nda ni zimwe mu nkurikizi zivuye kugutwarwa n’imyitwarariko y’ubuzima.

Hari ibimenyetso vy’indwara bikunda kwibonekeza mu mubiri, ariko ntibishobore kuvurwa n’imiti kuko biba vyavuye ku myitwarariko y’ubuzima iba yugarije umurwayi.
Abahinga mu bijanye n’inyifato bavuga ko ingorane z’ubuzima zifisemwo uruharo rudasanzwe ku ndwara zimwe zimwe zishikira umuntu. Iyo umuganga avuye gusa ibimenyetso bigaragara vy’indwara, ntavure icatumye indwara iza, iyo ndwara ntiheza ikira n’aho umurwayi yofata imiti.

Médiatrice Nibasumba, umwe mu bahinga mu bijanye n’inyifato, mu kiganiro yahaye ikinyamakuru IGIHE, kuri uyu wa kabiri wa 11 Ruhuhuma yamenyesheje ko ari ivya nkenerwa ko ubuvuzi busanzwe buhari bukoresha imiti bwokorana n’ubuvuzi buraba ivy’inyifato (psychoterapie) kugira umurwayi avurwe impande zose. Iyo bishitse umurwayi akavurwa, mu bipimo ntibabone igituma indwara kanaka yibonekeje, ni ngombwa ko ubuvuzi buraba ivy’inyifato busuzuma nabwo umurwayi kugira barabe ko bitoba vyavuye ku mibereho y’ubuzima.

Médiatrice Nibasumba

Nk’akarorero, umurwayi ashobora kwumva ababara mu mushishito, canke akagira ingorane z’umutima, ibipimo bikaduka. Mu gihe ubuvuzi bw’imiti butabonye impamvu ziboneka zabiteye, umurwayi bashobora guca bamubaza ko ata ngorane z’ubuzima zoba zamushikiye. Kubura uwawe, kwumva inkuru idahumuriza canke kurwa igihuhumura kuvyo aba yabonye atari yiteze, guhahamuka, biri mu bishobora kuba vyateye izo ndwara zo mu mubiri.

Mu bushakashatsi bwakozwe, basanze ko hari abantu bashobora kuduza ibiro mu buryo budasiguritse (prise de poid involontaire) canke bigakoroka mu munya muto (anorexie), bitavuye ku mfungurwa afungura ariko bivuye ku ngorane canke ku myitwarariko y’ubuzima umuntu aba yahuye nazo.
Kubwa Nibaruta, umuntu afise ingorane canke amaganya muriwe, ntiyari akwiye kwigunga wenyene, yari akwiye kwegera abandi akarondera uwo yobwira ibimubabaje mu gusohora ibiri muriwe kugira ntibikwege indwara zo mu mubiri.

Twobibutsa ko ubushakashatsi mu bijanye n’inyifato bwemeza ko kudasohora ivyababaje umutima bishobora gutera indwara zitoroshe gukira, nk’umushishito canke umutima.