Umugambi wo kuvura indwara zibangamiye abana ugiye kwagurwa

Reta y’Uburundi yiteguriye kwagura umugambi wo kuvura indwara z’abana muri rusangi, kugira umugambi w’ikimpumbi w’iterambere incuro ya 4 niya 5 unyaruke gushikwako.

Chloé Ndayikunda, umwunganirizi w’umushikiranganji w’amagara y’abantu no kurwanya ikiza ruhonyanganda SIDA yamenyesheje kuri uwu wa gatatu, igenekerezo rya 9 Mukakaro, ko igikorwa co kwitwararika kuvura indwara z’abana kikiri inyuma gushika ubu. Johannes Wedenig, aserukira ishirahamwe UNICEF mu Burundi, avuga ko ku bwiwe, igikorwa co kuvura indwara z’abana muri rusangi, kizotuma indwara zibangamira cane abana, nk’indwara ya marariya, iyo gucibwamwo hamwe n’indwara zo mu mahaha zigabanurwa kubw’imiti yabigenewe izoba yakoreshejwe, eka mbere n’indwara zizoba ziturutse ku gufungura nabi zikazotuzwa.

Abakora mu gisata c’amagara y’abantu bose bajejwe kuvura indwara z’abana bakaba bakwiye kwigishwa no kumenyeshwa uburyo izo ndwara z’abana zitatu (marariya, ugucibwamwo, n’iza mahaha) zifata n’ingene bozikinga.

Wedenig arongoye UNICEF mu Burundi akemeza neza ko mu gihe izo ndwara zitatu zomenyeshwa neza ingene zifata abana, zishobora kuvurwa neza, ababijejwe nabo bagakurikiranwa uburyo bazivura.