Accueil > Ubutunzi > Uburimyi > Umwimbu hari aho utera ubuhumbu
Umwimbu hari aho utera ubuhumbu
mardi 16 Mukakaro 2013
Mu gihe c’ici, ni igihe mu ntara zitandukanye z’Uburundi heze ibiharage. Mu ntara za Kirundo na Muyinga imiduga minini minini ijjayo iroye gusuma ivyo biharage, kugira babijane mu ntara zimwe zimwe usanga umwimbu utameze neza, canke bagaheza bakabimanukana mu gisagara ca Bujumbura.
Uyu mwaka rero mu ntara ya Muyinga ngo umwimbu w’ibiharage ntiwagenze nabi, kuko ijuru ntiryabaye ribi cane nko mu mwaka uheze. Iyo rero umwimbu wa bonetse, hari abanyagihugu baheza bagaca bajana umwimbu wabo mu masoko, hagera guteragira ugasanga basubiye mw’isoko gusuma bushasha. Muri komine ya Giteranyi mu ntara ya Muyinga, ngo imiduga imwe ikwegana, canke imwe bita FUSO, niyo usanga iriko iranyuragiranwa muri iyo komine, ndetse iyo miduga iraja ku mitumba nka yose igize iyo komine kurondera ibiharage, na cane cane ko mu gihe nk’iki c’ici, usanga bizimbutse cane.
![](local/cache-vignettes/L489xH367/kdo_fuso-757da.jpg?1517265340)
Abashinze intwaro, barahimiriza abanyagihugu kudahereza umwimbu mu masoko kuko iyo wishinze gushora, hagera guteragira, ukaja gusaba uwo wimye. Eka ndetse hari naho, hafatwa ingingo ko atagiharage gisubira kurenga ikomine n’imwe igize intara ya Muyinga kandi ivyo bigakorwa ku neza y’abanyagihugu bose. Ibiharage n’imfungurwa itunze abarundi benshi, kuko imfungurwa itagira igiharage, umenga ntaco ushize ku munwa. Abanyagihugu bose rero basabwa kuziganya umwimbu, kudasesagura amatungo yabo, na rirya benshi basesagura ivyo bimbuye bagomaba kwegeranya amafaranga yo kuja kunywa inzoga mu bunywero, canke ugasanga ni inyendamuvano yo kurondera umugore wundi.
Eka noneho, muri iyo komine uguharika kuravurwa cane, kandi benshi bagaharika mu gihe c’ugusarura ivyo bimbuye. Amafaranga mu gihe c’ici araboneka nk’uko bivura n’abamwe mu banyagihugu bo muri iyo komine. Maze wawundi ati :”Amafaranga abonetse haca haboneka n’ikiyarya”. Amafaranga yo mu ci, mu gihe c’ukwimbura aratera ubuhumbu bamwe bamwe, ari naco gituma abanyagihugu atari bake bahanurwa kwama biyumvira ejo hazoza, ntibame bishinga gusesagura.
![](local/cache-vignettes/L672xH449/kdo-5ca01.jpg?1550806115)
Aristide Nizigire