Umwimbu wabaye mwiza mu gice ca mbere c’irima

Umushikiranganji w’uburimyi n’ubworozi arashima umwimbu wabonetse mu gice ca mbere c’irima caraye kirangiye.

Ku munsi wa gatanu igenekerezo rya 17 Nzero 2014, umushikiranganji w’uburimyi n’ubworozi, Odette Kayitesi arashimishwa cane n’umwimbu wabonetse mu gice ca mbere c’irima (saison culturale A).

Umushikiranganji Odette Kayitesi akaba yagendeye abarimyi borozi ba kijambere bo mu ntara za Kayanza na Kirundo, intumbero ikaba yari iyo kuraba ingene umwimbu wagenze mu gice ca mbere c’irima hamwe no gutegura igice ca kabiri (saison culturale B).
Urwo rugendo rukaba rwakurikiye urwo yari yakoze mu ntango z’indwi twraye turangije ku magenekerezo ya 13 na 14 Nzero mu ntara za Bujumbura rural, Bururi, Gitega, Kayanza na Ngozi.

Urwo rugendo rwari urwo gusuzuma umugambi wa Reta wo gutanga ifumbire ku giciro gito, ingene wagenze, n’ico woba warunguye ku mwimbu. Umwimbu rero ukaba warongerekanye kuko abanyagihugu bahimirijwe cane ku vyerekeye uwo mugambi wa Reta.