Umwimbu wariyongereye bivanye n’umwavu watanzwe ku banyagihugu

Ku va muri Ntwarante umwaka uheze, Reta y’Uburundi yaratangije umugambi wo kurwiza umwavu w’ikizungu mwiza kandi ukwiye mu gihugu cose, umunyagihugu nawe adatanze amafaranga menshi.

Ubu abanyagihugu benshi bakaba bariko baratahura ko isi ndimwa yatitutse, ari naco gitumakugira bashobore kwimbura ari ngombwa bagaterana umwavu. Itituka ry’isi ndimwa mu Burundi rikaba ritumwa n’imvo nyinshi nk’uko bamwe mu bahinga mu gisata c’uburimyi babivuga. Umwavu rero, ukaba ufasha kugira umwimbu wiyongere, mu gihe isi itituka kandi ibandanya yaga, mu gihe iminwa yo gufungura yo ibandanya yiyongera, uko bukeye, uko bwije.

Umugambi wo gutanga umwavu mwiza kandi ukwiye ku murimyi, ukaba waje hageze nk’uko bamwe mu banyagihugu bo mu ntara ya Gitega babibariye ikinyamakuru IGIHE. Bavuga ko kuva utanguye, umuryango wahora uronka ibiro bitanu vy’umwavu ubu uronka ibiro bishika hafi mirongo ibiri na bitanu. Eka mbere bakavuga ko vyaragaragaye ko n’umwimbu waciye wiyongera. Igihugu c’Ubuhalande kikaba carafashije mw’itangwa ry’uwo mwavu.