Incamake

Abatwa bagiye muri CEPI na CECI basabwa kwerekana ko bashoboye

Yanditswe na MUGISHA Van Naris
Kuya 11 janvier 2018 saa 01:01
9000
0 0

Umukuru w’ishirahamwe Mpuzabatwa UNIPROBA amenyesha ko bisunze ibitigiri vy’ababserukira mu mirwi CEPI itegura amatora mu ntara na CECI itegura amatora ku rwego rw’amakomine,hariho intambwe bafatiye muri kahise k’umurwi CENI n’abatwa. Emmanuel NENGO arongoye UNIPROBA agasaba abatwa bashizwe muri iyo mirwi kwerekana ko bashoboye imirimo.

Emmanuel NENGO arongoye ishirahamwe mpuzabatwa UNIPROBA avuga ko, kuva umurwi utegura amatora CENI ku rwego rw’igihugu ujaho, batari bwaronke umutwa aja mu murwi utegura amatora ku rwego rw’intara CEPI, ariko ubu muri indwi batanze bararonse umwe mu ntara ya Rumonge.

Umukuru w’ishirahamwe Mpuzabatwa UNIPROBA avuga ko no mu mirwi itegura amatora CECI bashima intambwe bagezeko, kuko mu biharuro bafise, ku barenga 80 batanze ngo babaserukire, bamaze kumenya 13 baronse ibibanza muri iyo mirwi.

Emmanuel NENGO avuga ka kuba baserukiwe mu mirwi itegura amatora ku rwego rwa Komine CECI ,babishima kuko, abayigiyemwo baba bagiye gufashanya n’abandi barundi guterera no gukurikirana ivy’igihugu.

Naho hari ivyo bashima, Emmanuel NENGO arongoye UNIPROBA asigura ko batabona intambamyi yatumye bataronka ababaserukira barenza ico gitigiri, agasigura ko batumva ho uwo mukenyuro wabereye.

« Intambamyi gushika ubu kugira turonke abasumba abo ntituzibona, kuko abatanzwe bari bakwije ibisabwa n’amategeko. Muri 83 twari kuronka nka 20 canke 30. Amashuri n’ivyo bamaze kurangura nivyo twibaza ko ari umutego mukuru. Nayo ahandi ibisabwa nk’amashuri barabafise, bavuze tubahe umwe umwe, niho tutumva aho uwo mukenyuro wabereye. »

Umukuru w’ishirahamwe mpuzabatwa Emmanuel NENGO agahamagarira abatwa bagiye kubaserukira mu murwi CEPI na CECI, kwerekana ko bashoboye ibikorwa no kubika amabanga y’akazi bajejwe.

JPEG - 186.7 ko
Emmanuel NENGO,Umukuru w’ishirahamwe mpuzabatwa UNIPROBA

Ati : « Ico tubabwira, nuko baba bagiye abantu benshi bashaka kuraba ko vy’ukuri abatwa bashoboye. Tubabwira ati murerekana ko mushoboye, mwerekane ko mwubahiriza amasaha, mwubaha kandi mwubahiriza abo mukorana, kandi mwigenga ubuntu. »

Mwomenya ko kur’uyu wa gatatu igenekerezo rya 10 Nzero 2018, ariho imirwi itegura amatora ku rwego rw’intara CEPI yashikiriza mu gihugu cose, abagize imirwi itegura amatora ku rwego rw’amakomine CECI.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha