Evariste NDAYISHIMIYE : "Ico ni ikibazo c’ikoraniro Kaminuza ry’umugambwe"

Mu murwi w’igihugu ujejwe ibiganiro bihuza Abarundi (CNDI) basohoye kuri uwu wa gatanu icegeranyo ca nyuma c’ivyavuye mu biganiro uwo murwi wagiranye n’abarundi. Umurwi CNDI wamenyesheje muri ico cegeranyo ko abarundi benshi babajijwe bavuze ko bikenewe ko ibwirizwa nshingiro ry’Uburundi rihinyanyurwa, kugira rijane n’ibihe Uburundi burimwo. Kuri uwu wa gatanu nyene, umukuru w’igihugu Petero NKURUNZIZA yashizeho umurwi ujejwe kwihweza ivyohinduka mw’ibwirizwa shingiro ry’Uburundi.

Abatavuga rumwe n’ubutegetsi babona ko ukwo guhindura ibwirizwa shingiro ata kindi kugamije, atari ugukuramwo ibijanye n’ibiringo vy’umukuru w’igihugu, kugira umukuru w’igihugu Petero NKURUNZIZA yigumize ku butegetsi. N’umurwi w’igihugu ujejwe ibiganiro bihuza Abarundi washikirije ko benshi mubo baganiriye, basavye ko umukuru w’igihugu yotwara imyaka yose azoba yatowe, ata biringo bihari.

Mu mugambwe CNDD FDD usanzwe ukomokamwo umukuru w’igihugu NKURUNZIZA bavuga ko batarakorana kugira barabire hamwe ko bikenewe ko ibiringo vy’umukuru w’igihugu vyokurwa mw’ibwirizwa shingiro ry’Uburundi.

Evariste NDAYISHIMIYE, umunyamabanga mukuru w’uwo mugambwe avuga ko ico kibazo atari iciwe nk’umukuru w’umugambwe, ahubwo ko ari ikoraniro Kaminuza ry’uwo mugambwe rikorana rikaraba ibikenewe. Naho uwo mugambwe umenyesha ko utariga ikibazo c’ibiringo vy’umukuru w’igihugu, Evariste NDAYISHIMIYE avuga ko muri CNDD FDD bashigikiye ingingo ya Reta y’Uburundi y’ugushiraho umurwi wiga ingingo zimwe zimwe zohinyanyurwa muri iryo bwirizwa shingiro.

Evariste NDAYISHIMIYE, umunyamabanga mukuru w’umugambwe CNDD FDD