Gitega : Ubuyobozi bw’amagara y’ibitungwa bwemeje indwara y’akaranda k’impene

Yanditswe na MUGISHA Van Naris
Kuya 12 janvier 2018 saa 02:06
9480
0 0

Umuyobozi ajejwe amagara y’ibitungwa mu bushikiranganji bw’uburimyi n’ubworozi, amenyesha ko inyuma y’ubushakashatsi bwakozwe ku mpene zimaze iminsi zipfa mu ntara ya Gitega zirwaye indwara y’akaranda k’impene.

Mu kiganiro yahaye abamenyeshamakuru kur’uyu wa gatanu igenekerezo rya 12 Nzero 2018, Muganga Deogratias NSANGANIYUMWAMI avuga ko izo mpene ziriko zirapfa zari zatanzwe mu mugambi LEVEMPII w’Ibanki y’isi,zimwe zigurirwa mu gihugu hagati izindi zigurirwa mu bindi bihugu nk’Ubuganda.

Muganga Deogratias NSANGANIYUMWAMI avuga ko mu mpene zatanzwe harimwo izaciye zitangura kwerekana ibimenyetso ko zirwaye, mbere zihava zitangura gupfa, naho nyene abaganga b’ibitungwa bari bagerageje kuziha imiti itandukanye harimwo n’iyatanzwe n’umugambi wazitanze.

Muganga Deogratias NSANGANIYUMWAMI amenyesha ko gushika kw’igenekerezo rya 28 Kigarama 2017, ivyegeranyo bari bafise vyerekana ko mu mpene zatanzwe, izishika 3044 zari zimaze gupfa.

Umuyobozi w’amagara y’ibitungwa mu bushikiranganji bw’uburimyi n’ubworozi ahamagarira abanyagihugu kugaburirira impene mu mpongore, gutandukanya ibitungwa bimaze kurwara n’ibikomeye, kubandanya bagenzura ibimenyetso vy’indwara, guhagarika vy’infatakibanza amasoko adandaza ibitungwa bito bito, no guhagarika ko ibitungwa bitembera hagati y’intara za Gitega , Kirundo na Mwaro.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha