Umukuru w’igihugu aragabisha aboburagiza igikorwa co gusigura ibwirizwa nshingiro rishasha

Yanditswe na MUGISHA Van Naris
Kuya 13 décembre 2017 saa 08:53
Yasomwe :
0 0

Umukuru w’igihugu Petero NKURUNZIZA aragabisha abantu bose boburagiza umugambi wo gusigurira abanyagihugu integuro y’impinyanyuro z’Ibwirizwa Shingiro rihasanzwe, zizovamwo Ibwirizwa Shingiro rishasha. Aboba intambamyi babwiwe ko uwo ari umurongo utukura ntarengwa. Asaba kandi abarongoye abandi mu gihugu kurangwa n’ubumwe mu gihe ico gikorwa kizoba kiriko kiraba.

Mw’ijambo yashikirije kuri uwu wa kabiri igenekerezo rya 12 Kigarama 2017, igihe yariko yugurura icese isekeza ryo gusigurira abanyagihugu integuro y’Ibwirizwa Shingiro rishasha rigiye kugenga Uburundi, umukuru w’igihugu yamenyesheje ko muri rusangi, ibikenewe guhinduka ari ingingo zifise utunenge, ariko izitunganye zitazokomwakomwa.

Mu gihe abarongoye abandi kuva ku rwego rwo hasi ari intumwa z’umukuru w’igihugu, Petero NKURUNZIZA aramutswa igihugu c’Uburundi yavuze ko abarongoye abandi bazokwigira ba sindabibazwa muri uwo mugambi bazobibazwa n’ababakurira.

Umukuru w’igihugu yavuze ko ingingo zitazohinyanyurwa ari nk’izigize inkingi y’intwaro rusangi, amahoro n’umutekano, ugukingira abatavuga rumwe na Reta, uburenganzira n’inyungu z’inkehwa, ubwigenge ibisata bimwe bimwe bishingiyeko, no gukomeza ububasha inzego z’igihugu zihabwa n’ibwirizwa shingiro.

Muri iryo jambo, umukuru w’igihugu yasavye abarongoye abandi ko mu gihe co gusigura ibizohindurwa mw’ibwirizwa nshingiro, borangwa n’ubutwari, bagashengeza abangushi bakwiza ibihuha mu gihugu n’abandi bose barangwa n’igihushane c’ubumwe n’intwaro rusangi.

Umukuru w’igihugu yasavye kandi abamenyeshamakuru guterera uwo mugambi bisunga akarangamutima k’umwuga wo kumenyesha amakuru, mu kwirinda guhengamika inkuru, mu gukwiragiza ibihuha canke mu kutagumya ibanga iyo bikenewe.

Petero NKURUNZIZA yasavye ko ikirangaminsi cotegurwa

Ubushikiranganji bw’intwaro yo hagati mu gihugu bwasabwe ko bwotegura ikirangaminsi kivuga ingene abanyagihugu bazosigurirwa iyo nteguro y’ibwirizwa shingiro rishasha.

"Dusavye ko mu bushikiranganji bw’Intwaro yo hagati mu gihugu n’Inyigisho zo gukunda Igihugu, botunganya mu maguru masha ikirangamisii co gusigurira Abenegihugu ibishasha biri muri iyi nteguro kuva mu ntara gushika ku mitumba, na burya bihuriranye n’uko turiko turitegurira amatora yo mu mwaka w’2020."

Umukuru w’igihugu Petero NKURUNZIZA aragabisha abobera intambamyi uwo mugambi akababwira ko uwo ari umurongo utukura ntarengwa.

"Tuboneyeho akaryo ko kugabisha abantu bose bohirahira ngo baburagize uyo mugambi, haba mu mvugo canke mu ngiro. Nico gituma dusavye dushimitse abarongoye abandi mu nzego zose z’igihugu cacu ko borangwa n’ubumwe hamwe n’ubutwari, bagashengeza abangushi bakwiza ibihuha mu gihugu n’abandi bose barangwa n’igihushane c’ubumwe n’intwaro ya demokarasi."

Isekeza ryo gusigurira abanyagihugu integuro y’ibwirizwa nshingiro rishasha rigiye kugenga Uburundi, catanguriye muri komine Bugendana, intara ya Gitega.


Kumenyekanisha

1
greezy 15-12-2017 à 09:52

komera mutama hanyuma nce ndaba aho bazosubira kwitwaza ngo mandat asha ahubwo reka tuvyerekane ko tukigukeneye

2
Mwaro 13-12-2017 à 11:17

DD mubandanye mwikirigite murabesha ntabwo 2020 muzoyirya

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha