Uwutwara umugambwe RANAC i Muramvya apfungiwe mw’igendereza i Bujumbura

Yanditswe na Egide NDUWIMANA
Kuya 28 Ntwarante 2018 saa 04:20
18705
0 0

Uwutwara umugambwe RANAC mu ntara ya Muramvya, MANIRAKIZA Daniel apfungiwe mu biro vy’igendereza i Bujumbura kuva ku mugoroba wo kuri uwu wa kabiri. Muri uwo mugambwe bavuga ko yafashwe mu gihe yari agiye kuraba umukuru w’umugambwe ku rwego rw’igihugu yari apfungiwe mw’igendereza i Gitega. Uwo yari agiye kuraba yararekuwe, uwo wundi nawe atabwa muri yompi.

Georges NIKIZA, umuvugizi w’umugambwe RANAC amenyesha ko mu gihe bari bazi ko abo babiri barekuwe, umwe yatahukanwe muhira, uwundi ajanwa mw’igendereza.

"Ingene vyagenze, umukuru w’umugambwe ku rwego rw’igihugu, Aloys BARICAKO yarafatiwe i Gitega kuri uwu wa mbere. Kuwa kabiri mu gitondo niho abarongoye umugambwe mu ntara za Gitega, Muramvya, Mwaro na karusi bagenda kuraba umukuru w’umugambwe yari asanzwe apfungiwe mw’igendereza i Gitega. Bashitseyo yarabahambariye, mbere barabapfunga. Mu nyuma barabarekuye ariko uwutwara umugambwe i Muramvya baramugumana, bamanukanwa i Bujumbura, ashikira mw’igendereza, uwundi aja mu muryango wiwe."

JPEG - 73.5 ko
Georges NIKIZA, umuvugizi w’umugambwe RANAC

Umuvugizi w’umugambwe RANAC ashikiriza ko gushika ku muhingamo wo kuri uwu wa gatatu batari bwamenye ico MANIRAKIZA Daniel yagirizwa, canke ingene amerewe.

Georges NIKIZA aravuga kandi ivyo Aloys BARICAKO umukuru w’umugambwe RANAC ku rwego rw’igihugu yabajijwe mu mwanya yamaze mw’igendereza :

"Baramubajije imigenderanire y’umugambwe RANAC n’iyindi migambwe ikorera hanze, cane cane iyirongowe n’abantu bivugwa ko bashatse gutembagaza ubutegetsi. Bongera kandi baramubaza ko RANAC ishobora kuzotora ibwirizwa shingiro canke ntiritore."

Muri RANAC basaba ko bomenyeshwa igituma MANIRAKIZA Daniel akurikiranwa, bakavuga ko ari amakosa yakoze yoyahanirwa, ariko ataco yagirizwa arekurwe abandanye bikorwa vyiwe vya poritike.

Mu giporisi c’Uburundi bamenyesha ko uwo atwara umugambwe RANAC mu ntara ya Muramvya yagirizwa uguhungabanya inzego hamwe n’umutekano w’igihugu.

Umugambwe RANAC watanguye ibikorwa ku mugaragaro kw’igenekerezo ry’indwi ukwezi kwa kane 2017. Aho ni mu gihe wari urunani rw’imigambwe yagiye hamwe yitegurira amatora ya 2015. Urwo runani rugizwe n’imigambwe PASSIDE, ANADE, PPDRR, PACONA, ABASA hamwe n’umurwi wabaharanira ukwiyunga kw’umugambwe FRODEBU.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha