Imbonerakure zasabwe kwitandukanya n’ibikorwa vy’abajejwe umutekano

Mu gihe mu ntara zitandukanye z’igihugu hama havuzwe ko urwaruka rw’Imbonerakure z’umugambwe CNDD FDD zivanga mu bikorwa vy’abajejwe umutekano zigahohotera n’abanyagihugu, umukuru w’uwo mugambwe azisaba kwitandukanya n’ibikorwa vy’abajejwe umutekano.

Pascal Nyabenda umukuru w’umugambwe CNDD-FDD ku rwego rw’igihugu akaba yabivugiye i Busoni mu ntara ya Kirundo, inyuma yaho haheze iminsi abatavuga rumwe n’umugambwe uri ku butegetsi n’abanyagihugu batari bake, bamenyeshereje ko urwaruka rw’Imbonerakure z’umugambwe CNDD FDD rubakubagura, kandi rukabatoteza rwose. Abari mu mashirahamwe adaharanira ivyicaro vya poritike mu Burundi n’abo nyene, bakaba bari bamaze kugaragaza amakenga yabo kuri ivyo urwaruka ruri mu mugambwe CNDD FDD rwagirizwa.

Pascal Nyabenda rero, akaba yasavye urwaruka ruhurikiye mu mugambwe arongoye ko rwobandanya rufasha nk’uko rwama mu gutsimbataza amahoro n’umutekano, mu kwereka abajejwe umutekano, ariko ntibivange mu bikorwa vy’abajejwe umutekano. Ivyo bikaba biri ukwo, mu gihe muri iri yinga twaraye turangije, zimwe mu mbonerakurte zo mu ntara ya Bubanza zafatanywe itonga ziriko ziriba. Ku mutumba Kagwema, komine Gihanga intara ya Bubanza, urwaruka indwi rw’Imbonerakure z’umugambwe CNDD FDD rukaba arirwo rwafatanywe itonga ruriko ruriba kw’ibarabara Bujumbura - Cibitoke. Umwe muribo bivugwa ko ariwe yari afise inkoho yarashoboye gusiga abajejwe umutekano, abandi basigaye nabo bafashwe, bakaba baraciriwe urubanza rw’ugupfungwa umwaka wose.