Abasirikare ba AMISOM bagirijwe ubwicanyi bw’abanyagihugu 11

Imodoka yo mu bwoko bwa "blindé" y’umuryango w’Ubumwe bwa Afrika yoba yasetse inzu yica umugore n’abana biwe batanu mu bumanuko bw’ikivuko ca Marka, haraheze iminsi itatu. Amakuru ava muri Somaliya avuga ko ivyo vyabaye inyuma y’igisasu catewe imodoka y’ubumwe bwa Afrika.

Imbere y’aho, abasirikare barashe imodoka yo mu bwoko bwa "Bus" yunguruza abantu, bica abantu batandatu bari muri iyo modoka.

Mu gitero ca mbere, umunyagihugu yabibonye yavuze ko abasirikare buguruye umuriro kuri iyo modoka yunguruza abantu, hapfa abantu batandatu bari muriyo mu gisagara ca Qoryooley mu ntara ya Lower Shabelle.

Ubuyobozi bwa Amisom bwamenyesheje ko bwababajwe n’ivyabaye i Qoryooley aho igitero cahitanye ubuzima bw’abanyagihugu.

Amisom ibandanya ivuga ko yatanguye gutohoza ibirego vyegekwa ku nteko zayo, yegeranya n’ayandi makuru, imbere yuko isohora itangazo rikwiye.