Ibihugu vyo muri G7 ntivyashoboye kwumvikana

Abagize G7, inama y’ibihugu biteye imbere kurusha ibindi, ntibashoboye kwumvikana ku bihano vyofatigwa Uburusiya na Syria.

BBC dukesha iyi nkuru ivuga ko abashikiranganji b’imigenderanire n’amakungu bariko barondera guhuriza ku nyishu rusangi ku ndyane zo muri Syria, imbere y’uko umushikiranganji w’imigenderanire ya Amerika aja mu Burusiya kugondoza ico gihugu c’Uburusiya kuva kuri Syria.

Ivyo bihugu vyemeye ko ata nyishu ishobora kuboneka ku ndyane ziri muri Syria, mu gihe umukuru w’igihugu Assad akiri ku butegetsi.

Ivyo Ubwongereza bwasaba ko abasirikare bakuru bohabwa ibihano, navyo nyene vyigijwe hirya.

Iyo nama yabera mu gisagara ca Lucca mu Butaliyano, yakurikiranye n’igitero co muri Syria, bivugwa ko hakoreshejwemwo ubumara.

Syria yarahakanye ko itigeze ikora igitero c’ubumara ku gisagara ca Khan Sheikhoun kigenzugwa n’inyeshamba mu ndwi iheze, igitero cahitanye abantu 89.