RDC : Imitima iri mu kirere, ntawuzi ikiza kuba

Amatati ya poritike arabandanya muri Repuburika iharanira intwaro rusangi ya Congo, mu gihe umukuru w’igihugu Joseph Kabila arangiza ikiringo ciwe kuri uwu wa mbere igenekerezo rya 19 Kigarama, nk’uko bitegekanijwe n’ibiwirizwa shingiro ry’ico gihugu.

Ibiganiro vyo kurondera inyishu hagati ya Reta n’abo batavuga rumwe vyarungururijwe ku rindi sango mu ndwi iheze, inyuma y’uko binaniranye ko bashika ku masezerano.

Bitegekanijwe ko ivyo biganiro birongowe n’abasenyeri ba Ekleziya Katolika, bisubira kuba kw’igenekerezo rya 21 ukwezi kwa cumi na kabiri.

Hari Ubwoba ko hashobora kwaduka imyiyerekano kuri munsi wa mbere, abayoboke b’imigambwe itavuga rumwe na Reta biyamiriza umukuru w’igihugu Kabila bamusaba ko yova ku butegetsi.

Abatavuga rumwe na Reta bagiriza umukuru w’igihugu Kabila ko ariwe afise uruhara runini muri ayo matati, mu gushaka kuguma ku butegetsi.

BBC ivuga ko abantu barenga 50 bishwe mu myiyerekano y’abatavuga rumwe na Reta mu kwezi kw’icenda.

Abapolisi batatu nabo nyene bariciwe muri iyo myiyerekano.

Umukuru w’igihugu Kabila yavuze ko azoguma ku butegetsi kubera amatora atabaye igihe yari ategekanijwe mu kwezi kwa cumi na rimwe, ku buryo ubu atawomusubirira.

Abasirikare n’abaporisi bagavye ku mugwa mukuru Kinshasa, babonye abantu barenga cumi bakoranye bakaba baca babashwiragiza. Aho ni mu gihe imitima iri mu kirere hibazwa ko hashobora kuba iyindi myiyerekano.

Reta yategetse amashirahamwe y’itumatumanako gupfunga imbuga zose ngurukanabumenyi, kandi guhana bikomeye abahirahira bagakora imyiyerekano.

Umushikiranganji wo kumenyeshamakuru Lambert Mende yabwiye BBC ati : ”Kabila azoguma ku butegetsi gushika umukuru w’igihugu mushasha atorwe. Nta kindi gishobora gukorwa. Hagize umuntu ashaka gutera umudugararo aha mu gisagara, arahura n’igiporisi nk’uko bisanzwe bikorwa no mu yindi mihingo y’isi.”

Amatora yungururijwe mu 2018, ingingo abatavuga rumwe na Reta banegura bavuga ko ari amayeri y’umukuru w’igihugu Kabila yo kuguma ku butegetsi.

Nk’uko biri mw’ibwirizwa shingiro, ikiringo ca kabiri ca Kabila yagiye ku butegetsi inyuma y’igandagurwa rya se wiwe Laurent Kabila mu 2001, categerezwa kurangira kuri uwu wa mbere igenekerezo rya 19, hanyuma umukuru w’igihugu mushasha agatangura amabanga yiwe igenekerezo rya 20 z’ukwezi kwa cumi na kabiri.

Kuva igihugu ico gihugu kironse intahe yo kwikukira haraciye imyaka irenga 55, nta mukuru w’igihugu n’umwe arashikiriza ubutegetsi ku wumusubiriye mu mahoro n’umutekano.