RDC: Joseph Kabila yahakanye gushira umukono ku masezerano

Umukuru w’igihugu ca Republika iharanira intwaro rusangi ya Kongo Joseph Kabila amenyesha ko atagiye gushira umukono ku masezerano yo kugabangana ubutegetsi hagati yaw n’abatavugarumwe na Reta.

Inyuma yaho abasenyeri katorika bamenyesheje ko inyuma y’iminsi icumi hagiye guterwa umukono ku masezerano atuma haba intwaro rusangi izofasha gutunganya amatora atekanye kandi yitabwe na bose ,umukuru w’igihugu Joseph Kabila yarabakuriye inkoni ku gishitsi aho yababwiye ko agiye gutunganya amatora aho abanyagihugu bazokwemeza canke bahakane ko ibwirizwa nshingiro ryohinduka.

Kuri uno wa gatanu igenekerezo rya 30 Kigarama 2016,niho vyitezwe ko ibiganiro birangira ariko nta cizere co gushira umukono ku masezerano yotuma igihugu kironka amahoro.

Abashigikiye umukuru w’igihugu Joseph Kabila baramaze gutangura igikorwa co kwegeranya imikono yo kwemeza nimba ibwirizwa nshingiro ry’igihugu ca Republika iharanira intwaro rusangi ya Kongo ryohinduka.

Abadashigikiye ubutegetsi bwa Joseph Kabila umukuru w’igihugu babicishije mu myiyerekano barerekanye ko badashigikiye ikiringo ca gatatu c’umukuru w’igihugu.

Ibiringo vy’umukuru w’igihugu vyaheze kw’igenekerezo rya 19 Kigarama 2016.