RDC : ONU ivuga ko abantu barenga 40 aribo biciwe mu myiyerekano

Igihugu ca Repubulika iharanira intwaro rusangi ya Congo kirahakana icegeranyo giherutse gusohogwa n’ishirahamwe mpuzamakungu ONU, cagiriza abasirikare b’igihugu kwica abanyagihugu baja mu myiyerekano.

Reta ya Congo ihakana ico cegeranyo ivuga ko ibirego bivugwa ari amakuru y’ibinyoma afise intumbero yo kwambika iceyi ubutegetsi bwa Congo.

Ico cegeranyo casohotse ku munsi wa kabiri, kivuga ko n’imiburiburi abantu 40 b’abanyagihugu biciwe mu myiyerekano yo kwiyamiriza umukuru w’igihugu Joseph Kabila mu kwezi kwa 12, mu gisagara ca Kinshasa.

Nk’uko tubikesha BBC, ico cegeranyo kivuga ko bamwe mu bari muri iyo myiyerekano bakubiswe n’abasirikare hamwe n’abaporisi b’igihugu gushika aho bapfa.

Umushikiranganji ajejwe ihererekana ry’amakuru, Lambert Mende, avuga ko isohorwa ry’ico cegeranyo rifise intego yo gutanga isanamu mbi ku butungane bwa Congo, poritike y’igihugu hamwe no gucapfuza inzego zijejwe umutekano, aho kurondera kwuzuriza abagiriye ingorane muri iyo myiyerekano.