Uburusiya : Ibisigarira vy’indege yagize isanganya biriko biraronderwa

Ubushikiranganji bwo kwivuna abansi bw’Uburusiya bumenyesha ko amato, za kajugujugu hamwe n’izindi ndege zigenda zitarimwo umudereva "Drones" ziriko zirarondera indege yaguye mu Kiyaga cirabura.

Bimwe mu bimanyu vy’iyo ndege bimaze kuboneka mu mazi yo hafi ya Sochi nko ku kirometero n’igice uvuye ku nkengera z’amazi.

Iyo ndege -Tupolev-154, yarimwo abantu 92, abenshi bakaba bari mu mugwi w’abasirikare wa Alexandrov Ensemble, batunganya ibirori vy’iminsi mikuru, nk’uko tubikesha BBC.

Abo basirikare bari bitezwe kuremesha igiteramo ku kigo ca gisirikare c’Uburusiya hafi y’umuji wa Latakia muri Syria.

Muri abo bagize iryo sanganya, harimwo kandi n’abamenyeshamakuru hamwe n’abandi bakozi bo mu gisirikare.

Reta y’Uburusiya yatanguje kuri uwu wa mbere umunsi w’ikigandaro.