Abagendesha imiduga minini basaba kunyarutsa ibikorwa vy’ibarabara RN1

Abazana imizigo bayikuye haba mu bihugu bibanyi canke mu ntara hagati mu miduga mini, barafise umwizero ko mu minsi ibarabara rya Bujumbura Bugarama ryugawe rizugururwa mu gihe ibikorwa vyo kurisanura biriko biraba.

Imiduga mini ikaba yasabwe guhindura amayira, inyuma yaho ibarabara Bujumbura Bugarama rimanyuwe n’imvura yaguye mu kwezi kwa Ruhuhuma, iyo miduga yo mu bwoko bw’amakamyo igaheza ikaza iraca mu ntara za Rutana na Mwaro. Uretse ko abatwara iyo miduga bavuga ko bagira ingendo zinini, bavuga ko bagira n’uruhombo. Bamenyesha ko bakoresha igitoro cinshi, umwanya munini mu gushika i Bujumbura, ndetse n’ibidandazwa bica bizimba, abaguzi ugasanga ntibavyakira neza. Abo bazana ibidandazwa bakoreshe imiduga minini, bagasaba Reta y’Uburundi gukora ibishoboka kugira ibikorwa vy’iryo barabara birangire vuba.

Mukamenya ko ibarabara Bujumbura Bugarama,ryimburutse kubera imvura, igice kitari gito caryo kikaba caratwawe n’iyo mvura, igisuka mu mwonga, aho n’imiduga mito kugira irengane muri ako gace kasinzikaye atari ivyoroshe.