Accueil > Amakuru > Mu makungu > Abakenyezi 3 b’aba kurde baragandaguwe i Paris
Abakenyezi 3 b’aba kurde baragandaguwe i Paris
vendredi 11 Nzero 2013
Abategetsi bo mu Bufaransa, basanze abagore batatu bo mu bwoko bw’Abakurde, barimwo uwatanguJe umurwi w’abagwanyi bigumuye mu gihugu ca Turkiya, barashwe i Paris ku murwa mukuru, ejo ku musi wa kane. Umushikiranganji w’igihugu c’Ubufaransa ajejwe intwaro yo hagati, avuga ko bagandaguwe.
Abapolisi bavuga ko ibiziga vy’abo bagore batatu vyarimwo amasasu, imbere y’ibiro vy’AbaKurude bijejwe gutangaza amakuru.
Bavuga kandi kw’umwe mur’abo bagore, yitwa Sakine Cansiz, yari yatanguje umuhari witwa Kurdish Workers’ Party canke KKK: umurwi ugwanira ubwigenge bw’Abakurde mu gihugu ca Turkiya.
Umugore agira kabiri yagandaguwe, ni Frida Dogan afise imyaka 32 , akorera ivyo biro bijejwe gutangaza amakuru i Paris, kandi aserukira umugambwe w’Abakurde ufise icicaro i Buruseri mu gihugu c’u Bubirigi.
Umugore yagandaguwe agira gatatu ni Leyla Soylemez avugwa ko yahora aharanira ineza y’Abakurde. Abapolisi batangaje ko batanguje amatohoza.
Umushikiranganji w’igihugu c’Ubufaransa ajejwe intwaro yo hagati, Manuel Valls, yaragendeye ikibanza, abo bapfasoni bagandaguriwemwo ejo ku musi wa kane, akaba yavuze ko ubwo bwicanyi budashobora kwihanganirwa.
Marie Claire Ingabire
