Abakinyi baserukiye Uburundi muri CECAFA KAGAME Cup 2014 baridoga cane

Inkino za CECAFA KAGAME Cup 2014 zigeze mu gice c’umunani c’amahiganwa, imirwi nserukira bihugu irabandanya igice c’ikurakuranamwo.

Urutonde rw’inkino zabaye tutabashikirije, vyagenze uku gukwirikira :

1) Igenekerezo rya 13 Myandagaro:

 Igihe c’isaha indwi (13h 00) : Atletico Olympic yo mu Burundi yakinye na KCCA yo muri Ouganda. Kuri "penalty"yatewe n’Ubuganda, Atletico yaciye itsindwa 1-0

 Isaha icenda ( 15h00) : APR FC yo mu Rwanda yirahiye Telecom yo muri Djibouti 1-0, ico gitsindo umuhagarikizi ntiyagihurije na bagenzi we bo ku mpande ariko yaracemeje.

2) Igenekerezo rya 14 Myandagaro

 Isaha indwi (13h00): Adama city yanganije na Atlabara (1-1)

 Isaha icenda (15h00): Police FC yatsinze Benadir (3-1)

 Isaha cumi n’imwe (17h00) : Rayon Sports itsinda KMKM ( 1-0)

Ku rutonde rw’uno munsi w’umunani w’inkino inkino ziri uku gukwirikira:

 Isaha indwi (13h00): Atletico Olympic ikina na Djibouti Telecom

 Isaha icenda (15h00): El Merreikh itana mu mitwe na Vital’o

 Isaha cumi n’imwe (17h00): APR FC ikina na Gor Mahia

Mwomenya ko biguma bivugwa ko abakinyi bagiye guserukira Uburundi muri ayo mahiganwa bidoga cane kubera ukuntu bafashwe. Ubushikiranganji bubijejwe buvuga ko ata mahera busigaranye ko kandi abarongonzi ba CECAFA ari bo bategerezwa gutunganiriza abo bakinyi.