Abarwanyi ba M23 basabwe guhagarika ingwano

Abasirikare bo muri Repuburika iharanira intwaro rusangi ya Kongo barabandanya ibitero ku duce twa nyuma tukiri mu maboko y’abarwanyi bo mu murwi M23, hafi y’aho Repuburika iharanira intwaro rusang ya Kongo ihana imbibi n’Urwanda na Uganda.

Amakuru dukesha bagenzi bacu bakorera BBC muri ako karere amenyesha ko impunzi ziharurwa mu majana ziriko zihungira ingwano mu gihugu ca Uganda.
Nta mwanya munini uheze umukuru w’umurwi M23 ku rwego rwa poritike, Bertrand Bisimwa, atangaje ko umurwi ayobowe uhagaritse iingwano.

Bertrand Bisimwa, umukuru w’umurwi M23 ku rwego rwa poritike

Bertrand Bisimwa yasabye abarwanyi bose b’uwo murwi guca bahagarika ingwano kugira ibiganiro vy’amahoro bishobore kubandanya mu gisagara ca Kampala, mu gihugu ca Uganda.

Abasirikare ba Reta ya Repuburika iharanira intwaro rusangi ya Kongo, zibifashijwemwo n’abasirikare ba ONU, bamaze iminsi birukana abarwanyi bo mu murwi wa M23, mu turere dukomeye twahora tugenzurwa n’abo barwanyi ba M23, mu buseruko bw’igihugu ca Repuburika iharanira intwaro rusangi ya Kongo.