Accueil > Amakuru > Mu makungu > Uburusiya n’Ubuyapani baganiriye ku matati y’agataka
Uburusiya n’Ubuyapani baganiriye ku matati y’agataka
mardi 30 Ndamukiza 2013
Umushikiranganji wa mbere w’igihugu c’Ubuyapani, Shinzo Abe, n’umukuru w’igihugu c’Uburusiya, Vladimir Putin, barabonaniye I Moscou, ku murwa mukuru w’Uburusiya, ejo ku musi wa mbere. Bukaba bwabaye ubwa mbere abo betegetsi babonana, mu kiringo c’imyaka cumi.
Barumvikanye ku vyerekeye kwongereza utwigoro tw’ugutorera inyishu amatati yerekeye ubutaka, yatumye Ubuyapanzi n’Uburusiya bidashobora kutera igikumu ku masezerano y’amahoro yarangije ingwano ya kabiri y’isi yose.
Ayo matati yerekeye amazinga azwi mu Buyapani kw’izina rya Northern Territories, mu gihe mu Burusiya azwi kw’izina rya Kurils, Uburusiya bwafashe mu misi ya nyuma y’ingwano ya kabiri y’isi yose.
Umushikiranganji wa mbere w’Ubuyapani, Shinzo Abe, n’umukuru w’igihugu c’Uburusiya, Vladimir Putin, barumvikanye ko atari ibisanzwe kw’ibihugu vyabo bidateye igikumu ku masezerano y’amahoro mu kiringo c’imyaka itari mike, kuva ingwano ya kabiri y’isi yose irangiye.
Izo mpande zompi zarateye kandi igikumu ku masezerano yerekeye ubudandaji, imitahe, imico, ubuvuzi n’inkino.
Joel Sengurebe
