Abazokina urukino rwa Burundi - Namibie bongewe agashirukabute

Ishirahamwe ry’umupira w’amaguru mu Burundi (FFB) ryemereye abakinyi b’Intamba mu rugamba biteguriye urukino ruzohuza Uburundi na Namibie ko agashirukabute bazoronswa muri urwo rukino kavuye ku bihumbi amajana atanu vy’amarundi (500.000 Frs Bu), gashirwa ku bihumbi amajana indwi na mirongo itanu vy’amarundi (750.000 Frs Bu).

Iyo ngingo y’ukwongereza agashirukabute yafashwe na Révérien Ndikuriyo arongoye ishirahamwe ry’umupira w’amaguru mu Burundi (FFB), urwo rukino hagati y’Uburundi rukaba ruzoba kw’igenekerezo rya 26 Ntwarante 2016.
Amakuru atangwa n’ishirahamwe ry’umupira w’amaguru mu Burundi amenyesha ko abakinyi 12 bakina mu mirwi yo hanze y’igihugu c’Uburundi aribo bazotumwako muri urwo rukino, ariko hakaba hakiri igipfungu kuri Saido NTIBAZONKIZA bivugwa ko atazotumwako muri urwo rukino. Ibijanye n’imyiteguro y’urwo rukino tuzoyigarukako mu makuru yacu yo hanyuma.

Abakinyi b’INTAMBA MU RUGAMBA

Hagati aho, ihiganwa rya Primus League rirabandanya, ku munsi waryo wa 27, imirwi ikaba izohura uku gukurikira :

Kuri uwu wa gatanu igenekerezo rya 18 Ntwarante 2016, isaha icenda

Aigle Noir - LLB-S4A (Bazokinira ku kibuga c’i Makamba)

Kuwa gatandatu igenekerezo rya 19 Ntwarante 2016, isaha icenda

Olympic Muremera - Messager Buja (Bazokinira i Ngozi : Stade Agasaka)
Nyanza United - Messager Ngozi (Bazokinira mu Rumonge : Stade Magara)

Ku w’Imana igenekerezo rya 20 Ntwarante 2016, isaha icenda

Flambeau de l’Est - Buja City (Bazokinira mu Ruyigi)
Les Crocos - Inter Stars (Bazokinira mu Rumonge)

Kuwa kabiri igenekerezo rya 23 Ntwarante 2016, isaha icenda

Muzinga - Les Eléphants (Bazokinira ku kibuga citiriwe umuganwa Rudoviko Rwagasore)