Abubakar Shekau, umukuru wa Boko Haram yoba yagandaguwe

Igisirikare co mu gihugu ca Cameroun cashize ahabona isanamu (photo) ya Abubakar Shekau, umukuru w’umurwi w’iterabwoba Boko Haram, yishwe. N’aho ayo makuru y’urwo rupfu ataremezwa ku mugaragaro, n’igisirikare ca Nigeria camenyesheje ko Abubakar Shekau yapfiriye rimwe n’abandi barwanyi barenga 60 ba Boko Haram.

Inkuru y’imvaho yemeza urupfu rwa Abubakar Shekau, umukuru wa Boko Haram ntirashirwa ahabona, naho isanamu (photo) yerekanywe n’igisoda ca Cameroun igaragaza Abubakar Shekau, umukuru wa Boko Haram yagandaguwe. Mu gihe igisirikare ca Cameroun n’ica Nigeria biriko birwaniriza hamwe umurwi w’iterabwoba wa Boko Haram, nta ruhande na rumwe rurashobora kwiyemerera ko rwagandaguye Abubakar Shekau, ariko impande zompi zikavuga ko yaguye mu bitero vyabaye hagati y’igenekerezo rya 25 Mukakaro na 3 Myandagaro 2014, mu karere ka Konduga, mu buseruko bushira uburaruko bw’igihugu ca Nigeria, akarere gahana urubibe n’igihugu ca Cameroun.

Umurwi w’iterabwoba w’abarwanyi ba Boko Haram watanguye gutera mu gihugu ca Nigeria kuva mu mwaka w’2009. Muri uwu mwaka w’2014, abantu baharurwa mu bihumbi bibiri nibo bagandaguwe n’abo barwanyi ba Boko Haram.

Ntiribaye irya mbere havuzwe urupfu rwa Abubakar Shekau, umukuru wa Boko Haram

Mu kwezi kwa Ruheshi umwaka w’2013, igisirikare ca Nigeria camenyesheje ko cagandaguye Abubakar Shekau, ariko budakeye na kabiri aca asohora amasanamu (video) abeshuza, ahubwo agabisha ko ariko ategura ibindi bitero bizohitana abantu benshi.