Afrika y’Epfo: Umukuru w’Igihugu arahumuriza abanyamahanga bari muri ico gihugu

Umukuru w’igihugu c’Afrika y’Epfo, Jacob Zuma yavuye mu gacerere yararimwo, arishikira kugarukira ku banyamahanga bagejejwe kure n’ubwicanyi bumaze guhitana abagera kuri batandatu.

Abanyamahanga baba mu gihugu c’Afrika y’Epfo baramaze indwi zishika kuri zitatu barara ntibuca, batinya kwicwa bunyamaswa. Ivyo rero bikaba vyatanguye inyuma yaho, umwami w’abazoulou Goodwill Zwelithini, avuze ko abanyamahanga babwirizwa kwomorwa, atakibanza bafise muri ico gihugu, kuko baza gutwara ubuzi abenegihugu. Ico kikaba cabaye imbarutso y’ubwicanyi bukabije, bituma abanyamahanga bagera ku gihumbi bata izabo barahunga, bamwe baja gusaba indaro mu giporisi, abandi biyugaraniye mu mazu yabo.

Umukuru w’ico gihugu, Jacob Zuma akaba yishikiye ahahungiye bamwe muri abo banyamahanga kugira abaremeshe yongera abasabe gutekana, no gusubira mu mazu yabo ko ubwo bwicanyi bugiye guhagarara. Yaranamenyesheje ko ata majambo yoronka yo gusigura ubwo bwicanyi, ariko arabasaba ko boguma muri ico gihugu kandi bagiye gukingigwa.

Tubibutse ko inyuma y’ubwicanyi bukabijwe hakoreshejwe amahiri, aho bamwe baturigwa, ibihugu bitandukanye nka Malawi na Somalie baciye batangura gutegura inzira zose zo kuja gukingira abanyagihugu babo, babategurira uko basohoka amahoro ico gihugu