Afrika y’Epfo : Umunyamabanga wa mbere w’ubuserukizi bwa Maroc yagandaguwe

Umunyamabanga wa mbere w’ubuserukizi bw’igihugu ca Maroc muri Afrika y’Epfo yagandaguwe n’abantu bataramenyekana, aho bamusanze mw’ihoteri yari asanzwe abamwo.

Fatmi Noureddine akaba yagandaguwe kuri uyu wa kabiri ku muhingamo aho yari asanzwe yibana, ku murwa mukuru Pretoria. Abo bakorana babonye ko mugenzi wabo adatonze ku kazi kandi ntanavuge ko yafatiriwe, baragize amakenga bamuhamagaye kuri ngendanwa yiwe baca basanga irazimije. Abo bakorana bamaze gushika aho Fatmi Noureddine yaba, bakaba bahasanze amaraso yatemvye.

Abo bakorana n’ubwoba bwinshi,bakavuga ko batagira ayo bacira n’ayo bamira, kuko batumva intandaro y’ubwo bwicanyi. Bamwe bavuga ko yoba yishwe n’abasuma, kuko imwe muri za ngendanwa ziwe yibwe. Muri ico gihugu ca Afrika y’Epfo ubwicanyi ku bantu bukaba bumaze iminsi bwimonogoje, ariko rero bikavugwa ko amatohoza y’igiporisi co muri ico gihugu akomeye, ku buryo abakorana na Fatmi Noureddine bizeye ko ukuri kuzomenyekana ku bishe mugenzi wabo.