Abandi barondera kwongereza ibiringo vyo gutwara nawe agasaba kubigabanirizwa

Umukuru w’igihugu ca Sénégal, Macky Sall yahaye uburenganzira abanyagihugu bwo kumugabaniriza ikiringo co gutwara kikava ku myaka 7 kikaja ku myaka itanu.

Macky Sall umukuru w’igihugu ca Senegal

Aho mu bindi bihugu barondera guhindura ibwirizwa nshingiro mu ntumbero yo kwongereza ibiringo vyo gutwara, umukuru w’igihugu ca Sénégal wewe yahaye uburenganzira abanyagihugu bwo gutora namba ikiringo co gutwara cova ku myaka ndwi kikagabanuka kikaja ku myaka itanu. Mu gihe rero iyo nteguro y’itegeko yoramuka yemejwe, amatora azoca ahinduka abe mu mwaka w’2017, hako aba muri Ruhuhuma mu mwaka w’2019.

Mu mwaka w’2012 hari abari barigeze gucishamwo ako kantu, ubu rero bakaba bashimye gutwara iryo tegeko mu banyagihugu kugira baryemeze canke barihakane. Umukuru w’igihugu Macky Sall agira ati : "Birakwiye ko dutahura ibintu. Muri Afrika naho nyene turashobora gutanga icigwa, bakongera bakamenya kandi ko ubutegetsi atariryo herezo rya vyose."

Umukuru w’igihugu ca Sénégal aratandukanye cane na bagenzi we bo mu bihugu vya Afrika bafata bagakoresha ubutegetsi bwabo, bakongera bagatwara ikiringo kinini gose imyaka irenga icumi, batanabirekuriwe n’amategeko. Uwo mukuru w’igihugu akaba atandukanye na mugenzi we yasubiriye Abdoulaye Wade, nawe yari yashatse kwiyongera ikiringo ca gatatu, yirengagiza amategeko y’igihugu yamurekurira ibiringo bibiri gusa.

Bamwe mu banya Sénégal bavyakiriye neza, abandi bibaza ko woba ari umukino wa poritike, abandi nabo bibaza ko yoba ashaka kwihesha isura nziza mu makungu hamwe no muri Sénégal. Ivyo rero Macky Sall akaba yabishikirije igihe yariko abonana n’ishirahamwe APES ry’abamenyeshamakuru b’abanyamahanga bakorera aho muri Sénégal.