Algérie : Abdalaziz Bouteflika yipfuza ikiringo ca kane

Mu mabarabara y’igisagara ca Alger hiriwe imyiyerekano y’abanyagihugu bari mu muhari wa BARAKAT, aho biyamiriza ikiringo ca kane ca Abdelaziz Bouteflika.

Abo bari mu muhari wa BARAKAT bamenyesha ko bagarutse mu mabarabara yo mu gisagara ca Alger, kugira biyamirize ikindi kiringo ca kane ca Bouteflika, bakaba bamwagiriza ko intwaro yiwe yaranzwe n’ibiturire. Abariko baramwiyamiriza rero bakaba benshi bari barwiriyemwo abakiri bato, aho bavuga ko bakeneye impinduka mu gihugu. Abdelaziz Bouteflika w’imyaka 77 y’amavuka, akaba amaze imyaka 15 ku butegetsi, ubu naho kuwa 22 Ruhuhuma, akaba yasavye nawe kwitoza mu kiringo kigira kane. Kuva ico gihe, abanyagihugu bo mu gihugu ca Algeriya bakaba batahengeshanije kwiyamiriza ico kiringo kindi.

Abaporisi bambaye impuzu zisanzwe bari kumwe n’abandi bambaye iza giporisi, ariko ata birwanisho bafise, bakaba bagumye babuza abagira imyiyerekano yo kwiyamiriza ikiringo ca kane.
Mwomenya ko Abdelaziz Bouteflika amagara yiwe atifashe neza, aho ndetse akunda no kuja kwivuriza hanze, kubera amagara make.