Amasendika y’abigisha ararahira ko atazotanga amanota y’igice ca kabiri

Amasendika ahurikiyemwo abigisha amenyesha ko ingingo yo kudatanga amanota y’igice ca kabiri ari ntabanduka, hamwe Reta y’ Uburundi itokuraho bwa busumbasumbane bw’imishahahara, nk’uko bishikirizwa na Emmanuel Mashandari arongoye sendika CONAPES.

Emmanuel Mashandari arongoye sendika CONAPES

Mu kiganiro n’abamenyeshamakuru co kuri uno wa kane, abo bigisha bahurikiye mu masendika STEB, SLEB , SYNAPEP na CONAPES, bararahira bakarengwa ko batazogenda batanze amanota y’igice ca kabiri c’umwaka w’ishure, kuko Reta yagumye yirengagiza kwumviriza ibibazo vyabo, na cane cane ikijanye n’ubusumbasumbane bw’imishahara. Ku cerekeye ko abana nabo bashinzwe aribo bariko barwa mu mporera , Emmanuel Mashandari agira ati:’’ ntiduhana abanyeshure kuko amategeko araturekurira gukora yegereyegere iyo harivyo tutahuje n’abakoresha’’.

Abo bigisha bavuga ko iminsi yose Reta yama yemera ibintu ariko ntiyigere ibishira mu ngiro, bavuga ko bipfuza ko imishahara yoharurwa hakurikije amategeko. Kuko bitumvikana ingene umushahara w’umwe usumbana n’uwo bakorana canke uwukora mu kindi gisata, igituma umushahara munaka ku rupapuro rw’umutsindo kanaka idasa. Ayo masendika y’abigisha avuga ko bashaka kurwanya ico kintu c’uko bamwe bafashwe neza abandi nabo bagafatwa nabi.