Amerika: "Turazi uwakoresheje ibirwanisho vy’ubumara"

Umushikiranganji ajejwe imigenderanire wa Leta zunze ubumwe z’Amerika, John Kerry, avuga ko Amerika izi ahavuye, igihe, hamwe n’uwakoresheje ibirwanisho vy’ubumara muri Syria.

Mw’ijambo yacishije ku mboneshakure asigura igituma Amerika igomba gutera Leta ya Syria, Kerry yavuze ko abanye Syria bashika 1429 bishwe muri ico gitero, harimwo abana 426. Yavuze ko ibimenyetso bihweje vyerekana ko abakozi ba Leta ya Syria bari mu kibanza igitero cabereyemwo iminsi itatu imbere y’uko kiba, bariko baragitegura.
Kerry yavuze yuko gufata ingingo mu guhangana n’ivyaha bihohotera ikiremwo muntu ari inshingano y’ubutegetsi ba Amerika, bikanayigirira akamaro ku gihagararo cayo.

Mu gihe Kerry yashikiriza iryo jambo, icegeranyo cari cagizwe ibanga kuri ico gitero caciye gishirwa ahabona.