Asec Mimosa yo muri Cote d’Ivoire yatsinze Lydia Academique wo mu Burundi

Mu gice c’umunani gishira icanyuma c’imirwi yabaye iya mbere iwabo, umurwi waserukiye Uburundi Lydia Academique waratsinzwe n’umurwi wo mu gihugu ca Cote d’Ivoire, Asec Mimosa igitsindo kimwe ku busa. Urukino rwo gusubiza rukazoba mu ndwi zibiri.

Umurwi Asec Mimosa

Mu gihe biri uko mu mupira w’amaguru, umukuru w’ishirahamwe ryo kwinonora imitsi mu Burundi Diyodone Kwizera,aramenyesha ko abanonotsi b’abarundi bakoresheje umwanya mwiza mu mahiganwa yo mu ndwi iheze, bigaca bitanga umwizero ko Uburundi buzokwigenza neza mu mahiganwa azobera muri Leta zunze ubumwe za Amerika, mu Bufaransa, hamwe n’i Moscou.

Ukwinonora imitsi mu Burundi ngo kuriko kurakomera kuko umwigeme Diane Nukuri aherutse kuba uwu 8 mw’ihiganwa ry’isi ryo kwinonora imitsi ryabereye i Boston muri Leta zunze ubumwe za Amerika.