’’Ata mahoro, nta terambere rizoshikwako muri Afrika’’

Mu nama iriko ihuza abakuru b’ibihugu vyo muri Afrika hamwe n’ibihugu vy’abarabu, abayitavye barashima intambwe ivyo bihugu bigezeko mu bisata vyo gufashanya nk’uko vyashikirijwe n’umukuru w’igihugu ca Libiya Nouri Abou Sahmen ari kumwe na mugenzi we wo muri Gabon Ali Bongo Ondimba.

Umukuru w’igihugu ca Gabon akaba avuga ko ibihugu vy’Afrika n’ivy’abarabu bikwiye gushira mu maguru masha uburyo bwo guhanahana ibidandazwa, ivyo bikaba vyoza bishirwa mu ngiro mu nama izokurikira yo mu mwaka w’2014, ku buryo mu nama igira kane y’Afrika n’ibihugu vy’abarabu ico kibazo coba camaze kwigwa neza ndetse camaze kuja mu ngiro mu mwaka w’2016.

Imfashanyo rero igera ku muriyaridi w’amanyamerika akaba ariyo agiye kuzotangwa kugira afashe ibihugu vy’Afrika mu bikorwa vy’ubwubatsi. Umushikiranganji wa mbere w’igihugu ca Etiyopiya asanzwe ari nawe arongoye muri iki kiringo ishirahamwe ry’ibihugu vy’Ubumwe bw’Afrika, yamenyesheje muri iyo nama iriko iraba kuri uyu wa kabiri kuwa 19 Munyonyo, ko ibihugu vy’abarabu vyofasha cane ibihugu vy’Afrika mu bisata vy’indero, ubuhinga bwa none, gutanga inyigisho ku banyafrika bipfuza kuja kwiga mu bihugu vy’abarabu, igisata c’amagara y’abantu no gufasha igisata co gutumatumanako amakuru, kugira iterambere risage abanyafrika bose, nk’uko vyabandanije bivugwa na Hailemariam Dessalegn, arongoye ishirahamwe ry’Ubumwe bw’Afrika.

Muri iyo nama iriko ihuza abakuru b’ibihugu bagera kuri 40 mu gisagara ca
Kuwait City muri Koweit, ikaba yitabwe kandi na Nyenicubahiro Petero Nkurunziza, umukuru w’igihugu c’Uburundi. Ariko rero naho ibihugu vy’Afrika biriko bariruka rwose mu guteza imbere abanyagihugu babanje kurwanya ubukene kugira iterambere riboneke, Ali Bongo Ondimba, umukuru w’igihugu ca Gabon we avuga ko ivyo vyose bizoshikwako mu gihe habonetse amahoro mu bihugu vy’Afrika. Amahoro amaze kuboneka, umwimbu uzorwira, ndetse n’abanyamitahe bakaba bozoshobora kuyizana muri Afrika.