Ban Ki-Moon yasavye ko abasirikare bokwongerezwa muri Centrafrique

Umunyamabanga mukuru w’ishirahamwe mpuzamakungu ONU (Organisation des Nations Unies), Ban Ki-Moon yasavye inama nkuru y’umutekano ko yotanga uburenganzira bwo kurungika abandi basirikare bagera ku majana atanu na mirongo itandatu (560) mu gihugu ca Centrafrique kugira bakingire ibikorwa vya ONU.

Imwe mu ngingo zafashwe n’ishirahamwe mpuzamakungu ONU kugira umutekano ugarukirwe muri Centrafrique kwabaye ugukomeza ibikorwa vy’abasirikare ba ONU bari muri Centrafrique, atari mu gisagara ca Bangui gusa, ahubwo no hanze y’igisagara. Ariko n’aho abo basirikare baboneka muri Centrafrique, kuva aho François Bozizé akomborewe, ibiro (BINUCA) vy’ishirahamwe mpuzamakungu ONU muri ico gihugu biguma bikorwako ibitero, bikongera bigasahurwa akari gake.

Ban Ki-Moon, umunyamabanga mukuru w’ishirahamwe mpuzamakungu ONU

Ban Ki-Moon asaba rero ko abo basirikare bokwongerezwa, bakabanza bakarungika 250, abandi 560 bakazorungikwa abo bandi bamaze gukwiragizwa mu ntara.
Izo ngabo zizoba zifise igikorwa co gukingira inyubakwa n’abakozi b’ishirahamwe mpuzamakungu muri Centrafrique, ariko biratomoye ko ahari icicaro c’iryo shirahamwe bazofasha kugarukana amahoro.

Inama nkuru y’umutekano irindiriye uruhusha rw’ishirahamwe ry’ubumwe bwa Afrika hamwe n’abafasha muri ivyo bikorwa kugira bace barungika abo bandi basirikare ba ONU muri Centrafrique. Ibihugu vy’Ubwongereza na Leta zunze ubumwe za Amerika biracafise amakenga kuri iryo rungikwa ry’abo basirikare, kuko rishobora gutwara amafaranga yagenewe Somaliya isanzwe ariyo iza imbere mubofashwa kuri ivyo bihugu uko ari bibiri.