Accueil > Amakuru > Mu makungu > Barack Obama, Intwaro ibereye n’iterambere biramaze gutera intambwe muri (...)
Barack Obama, Intwaro ibereye n’iterambere biramaze gutera intambwe muri Afrika
jeudi 28 Ntwarante 2013
Umukuru w’igihugu c’ Amerika, Barack Obama, yarakiye abategetsi b’ibihugu vya Cap-Vert, Malawi, Senegal na Sierra Leone, mu biro vyiwe, Maison Blanche, ejo ku musi wa kane akaba yarahayagije intambwe mu vyerekeye ubutunzi ibihugu vyabo vyagize, n’intambwe ku vyerekeye gukomeza intwaro ibereye.
Barack Obama yavuze kw’abashitsi biwe bose bagize ibibazo bitoroshe vyerekeye politike mu bihugu vyabo, ko yamara ivyo bibazo harimwo ingwano muri Sierra Leone, ibibazo bifatiye kw’ibwirizwa nshingiro mu gihugu ca Malawi, n’ibibazo vya politike mu gihugu ca Senegal, vyasubiriwe n’intambwe mu bijanye n’umutekano n’iterambere.
Abo bategetsi mu nama na Obama, barimwo Umukuru w’igihugu wa Sierra Leone, Ernest Bai Koroma, n’umukuru w’igihugu wa Senegal, Macky Sall, umushikiranganji wa mbere w’amazinga ya Cap-Vert, Jose Maria Pereira Neves, n’umukuru w’igihugu ca Malawi, Joyce Banda.
Barack Obama yarakiye inama nkiyo mu mwaka w’2011, n’abategetsi b’ibihugu vya Benin, Guinee, Cote d’Ivoire na Niger, imbere y’isohorwa mu mwaka w’2012 ry’umugambi ugenewe gukomeza ugukorana, mu vyerekeye ubutunzi na politike, n’ibihugu vyo mu karere ko muri Afrika, yo musi y’ubugararwa bwa Sahara.
Paterne Sengiyumva
