Burkina Faso : Ishirahamwe ry’ubumwe bw’Afrika riragabisha ubutegetsi buhari

Inama nkuru y’umutekano y’ishirahamwe ry’ubumwe bw’Afrika isaba igisirikare ca Burkina Faso gusubiza ubutegetsi muri izi ndwi zibiri ziza, atari aho ibihano bishobora gufatwa.

Indwi zibiri nico kiringo catanzwe n’ishirahamwe ry’ubumwe bw’Afrika kugira igisirikare kibe catanze ubutegetsi. Ivyo bikaba vyavugiwe mu nama y’umutekano y’iryo shirahamwe. Mu gihe naho batovyubahiriza, ishirahamwe ry’ubumwe bw’Afrika rimenyesha ko ibihano bitegekanijwe kuri ico gihugu.

Ivyo ishirahamwe ry’ubumwe bw’Afrika ribishikirije inyuma yaho Lieutenant Colonel Isaac Zida yiyemeje imbere y’abasanzwe baserukira ibihugu vyabo ko azoshiraho Reta mfatakibanza itwarwa n’umutegetsi bumvikanyeko bose kandi nk’uko bitegekanywa mw’ibwirizwa shingiro.

Amakuru tubandanya dukura ku kinyamakuru Jeune Afrique amenyesha ko Zida yongeye aranamenyesha ko imbibe z’igihugu zisubiye kwugururwa kugira ibikorwa na cane cane bijanye n’ubutunzi bisubire, nk’uruja n’uruza rw’abantu n’ibintu bibandanye. Tubibutse ko iminsi itatu inyuma yaho Blaise Compaoré atanze imihoho ,igisirikare ca Burkina Faso nico caciye kija ku butegetsi, Lieutenant Isaac Zida akaba yaciye aba ariwe ararongora Reta mfatakibanza.