Burkina faso : Zida asa n’uwutemera gusubiza ubutegetsi uwutari umusirikare

Umukuru w’igihugu ca Burkina Faso vy’imfatakibanza, Lt Col Isaac ZIDA asa n’uwudatomora namba agiye gusubiza ubutegetsi uwutari umusirikare mu kiringo kitarenze indwi zibiri, nk’uko vyari vyasabwe n’ishirahamwe ry’ubumwe bwa Afrika, aho mbere iryo shirahamwe ryagabisha ko n’ibihano bizofatwa mu gihe ivyo basaba bitokurikizwa.

Ikiringo c’iminsi cumi n’itanu rero nico catanzwe n’ishirahamwe ry’ubumwe bwa Afrika kugira uwuramutswa ico gihugu vy’imfatakibanza abe yashikirije ubutegetsi ku wutari umusirikare. Lt Colonel Isaac Zida gushika ubu avuga ko ivyo biraba ishirahamwe ry’ubumwe bwa Afrika. Mu kiganiro n’abanditsi n’abamenyeshamakuru co kuri uno wa kane i Ouagadougou, yavuze ko ico kiringo catanzwe kitamuraje ishinga namba. Ku bwiwe, igihambaye n’ugushika ku mwumvikano wotuma bashika ku mpera y’umwaka ata ngorane, bakongera bagakora amatora.

Lt Colonel Isaac Zida

Tubibutse ko igisirikare cafashe ubutegetsi inyuma yaho Blaise Compaore atangiye imihoho biturutse ku migumuko ikomeye y’abanyagihugu. Ubutegetsi buhari bukaba bwemeye gutunganya amatora mu kiringo c’umwaka umwe, ariko ntiburavuga uwuzorongora igihugu vy’imfatakibanza gushika ico gihe.