Blaise Compaoré : Abasirikare bakoreye hamwe n’abatavuga rumwe n’ubutegetsi

Uwahoze ari umukuru w’igihugu ca Burkina Fasso yemeza ko kuba yarakombowe ku butegetsi bitavuye ku mugambi yari afise wo kwigumiza ku butegetsi, ahubwo ko vyavuye ku batavuga rumwe n’ubutegetsi bwiwe bakoreye hamwe n’igisirikare mu kumukombora.

Mu buhungiro aho ari mu gihugu ca Côte d’Ivoire, Blaise Compaoré amenyesha ko ata kintu na kimwe cari gusubiza inyuma umugambi wari uhari wo gushikira ubutegetsi biciye mu nguvu. Ku bwiwe, kuba ibwirizwa shingiro ryagira rihindurwe kugira azosubire kwitoza mu 2016 siyo ntandaro y’imigumuko. Blaise Compaoré avuga ko naho uguhindura ibwirizwa shingiro vyari guca mu nama nshingamateka, canke mu banyagihugu ubwabo (référendum), ntaco vyari guhindura kuko abatavuga rumwe n’ubutegetsi bwiwe bari bamaze gucudika n’igisirikare, kugira akurwe ku butegetsi ku nguvu.

Blaise Compaoré

Uwo yahoze ari umukuru w’igihugu ca Burkina Fasso aremeza ko yari yaviyumvisemwo ko ashobora gukomborwa, kuko yari yamaze kumenya hari bamwe mu batavuga rumwe n’ubutegetsi bwiwe bari bafitaniye imigenderanire ikomeye n’intwazangabo z’igisirikare ca Burkina Fasso, ivyo navyo akaba ata kindi vyari bigamije atari gutembagaza ubutegetsi.
Blaise Compaoré amenyesha ko igikuru ar’uko yamaze gusubiza ubutegetsi, hama kuba yakoze vyiza canke bibi, yishura ko kazoza ariko kazovyerekana.

N’aho adatomora, aragaruka akemeza ko ku myaka 27 yamaze ku butegetsi hari abo yaruhishije, ariko akaba adatomora abaribo. Ku bijanye n’uwamusubiriye mu kibanza vy’imfatakibanza ariwe Lieutenant-Colonel Isaac Zida, Blaise Compaoré avuga ko yihaye amananiza.