Bururi : Umuntu umwe yishwe arashwe n’abitwaje ibirwanisho

Umuntu umwe niwe yishwe arashwe mw’ijoro ryo kuri uwu wa gatandatu mu gitero c’abantu bitwaje ibirwanisho cabaye ku rugo rumwe ruri i Nyagasasa muri Komine Mugamba, intara ya Bururi. Abo bitwaje ibirwanisho bahejeje kwica uwo muntu baciye bagenda.

Ico gitero cabaye nk’igihe c’isaha imwe z’ijoro kuri uwu wa gatandatu, umwigeme azwi kw’izina rya NAHIMANA Floride akaba ariwe yishwe n’abo bantu bitwaje ibirwanisho batamenyekanye. Abasirikare hamwe n’abaporisi barashitse ahabereye ubwo bwicanyi, ariko bakaba atawe bashobye gufata muri abo bantu bitwaje inkoho batamenyekanye.

Amakuru atangwa n’abanyagihugu b’i Nyagasasa avuga ko uwo mwigeme yoba yazize ivyo yagirizwa ko yahora akorana n’abajejwe umutekano, mu kudoma urutoke ku bahungabanya umutekano aho i Nyagasasa.