Cameroun : Paul Biya yijeje abo arongoye ko agiye gutuza Boko Haram

Inyuma y’aho abari bafashwe mpiri bagera kuri 27 n’umurwi w’intagondwa wa Boko Haram barekuriwe, umukuru w’igihugu ca Cameroun Paul Biya avuga ko agiye gutuza izo ntagondwa.

Ivyo uwo mukuru w’igihugu ca Cameroun akaba yabibariye abanyamakuru igihe bari ku kirimba iwe, hariko hariginwa irekurwa ry’abo bantu 27, harimwo umukeyezi w’icegera c’umukuru w’igihugu, abashinwa 10 hamwe n’abandi bari bamaze igihe bafashwe mpiri n’uwo muhari wegamiye idini rya Islam mu gihugu ca Nigeria. N’umunezero mw’inshi, umukuru w’igihugu ca Cameroun akaba yemereye abanyagihugu gutuza izo ntagondwa zihaye kunyuruza abantu. Avuga ko iyo ari intango, abo arongoye borindira akari inyuma.

Ariko rero bikavugwa ko Paul Biya atigeze avuga uburyo azokoresha kugira atuze izo ntagondwa mu gihe biboneka ko nazo nyene zitareze amaboko, kuko iyo mirwi ifise ibirwanisho n’uburyo bwo kwivuna.