CAN 2013: Togo yashitse mu gice ca kane gishira ica nyuma

Umugwi nserukiragihugu w’igihugu ca Togo wararonse uburenganzira bwo gukina igice ca kane gishira ica nyuma inyuma y’urukino rwabahuje n’umugwi nserukiragihugu wa Tunisia,mu rukino rwabaye k’umugoroba wo kuri uno wa gatatu igenekerezo rya 30 Nzero 2013.

Nk’uko amakuru dukesha ikinyamakuru Jeuneafrique abivuga,urwo rukino rwa nyuma rwo mu mugwi D rwabaye urukino ruzogira kahise kuko bibaye ku ncuro ya mbere ko umugwi nserukiragihugu wa Togo ushika mu gice ca kane gishira ica nyuma mw’ihiganwa rihuza imigwi nserukirabihugu yo muri Afrika.

Uwo mugwi nserukiragihugu wa Togo ukaba washitse muri ico gice inyuma y’aho unganirije n’umugwi wa Tunisia igitsindo kimwe ku kindi.Umugwi wa Togo ukaba ujanye n’umugwi wa Cote d’Ivoire inyuma y’aho nawo unganirije n’umugwi wa Algeria ibitsindo bibiri kuri bibiri.