CAN:Umugwi wa Zambiya waravuye mw’ihiganwa

Umugwi nserukiragihugu wa Zambiya waravuye mw’ihiganwa rihuza imigwi nserukirabihugu yo muri Afrika inyuma yaho unganirije n’umugwi nserukiragihugu wa Burkina Faso mu rukino rwabaye kuri uno wa kabiri igenekerezo rya 29 Nzero 2013.

Urukino rwatanguye igihe c’isaha imwe y’ijoro ku masaha yo m’u Burundi.Iyo migwi yose yakina ishizemwo inguvu nyinshi kuko imigwi yose yaronse uburyo bwinshi bwo kwinjiza, ariko nta mugwi washoboye kuronka igitsindo.

Ku ruhande rw’umugwi wa Zambiya abakinyi Mayuka,Mbesuma na Christophe Katongo baragerageje gutera mw’igori ariko biba impfagusa,kuko k’umunota wa 16 Mayuka yarateye ariko umupira urwa mu minwe ya Daouda Diakite umunyezamu wa Burkina Faso.

K’umunota wa 58 bivuye k’umupira utewe na Kalaba umukinyi Mbesuma yarateye umupira n’umutwe ariko uca hejuru gato y’igori.
Umugwi nserukiragihugu wa Burkina Faso ntiwatanguye neza urwo rukino kuko k’umunota wa 11 umukinyi Alain Traore ari mu binjije ibitsindo vyinshi muri iryo higanwa yavuye mu kibuga kubera yari akomeretse.

Urukino rukaba rwaheze imigwi yose inganije atawutsinze uwundi,umugwi nserukiragihugu wa Burkina Faso ukaba ariwo uca ubandanya ufise amanota atanu.

Tubamenyeshe ko umugwi nserukiragihugu wa Zambiya ariwo ufise igikombe c’iryo higanwa co mu mwaka uheze.Umugwi wa Burkina Faso uzohura n’umugwi utsinda hagati ya Togo na Tunisie.