Centrafrika : Intwaro mfatakibanza yongerejwe ikiringo

Umukuru w’igihugu Denis Sassou Nguesso, asanzwe ari umuhuza mu gihugu ca Centrafrika, yemeye ko intwaro mfatakibanza yokwongerezwa ikiringo muri ico gihugu, aho ni mu gihe vyari bitegekanijwe ko ikiringo mfatakibanza kizorangira mu kwezi kwa Ruhuhuma.

Mu gihe intwaro mfatakibanza mu gihugu ca Centrafrika yategerezwa kurangira mu kwezi kwa Ruhuhuma uno mwaka w’2015, bahisemwo kwongerezako amezi atandatu. Umukuru w’igihugu ca Congo Denis Sassou Nguesso, asanzwe ari nawe muhuza mu ntambara yagiye iba, akaba yabimenyesheje abategetsi b’ico gihugu mw’ikete yabandikiye ryo kuwa 22 Kigarama umwaka urangiye w’2014.

Muri iryo kete ryandikiwe Catherine Samba Panza asanzwe ari umukuru w’igihugu mfatakibanza, Mahamat Kamoun asanzwe ari umushikiranganji wa mbere w’ico gihugu hamwe na Alexandre N’Guendet umukuru w’inama nkuru y’intwaro mfatakibanza, umukuru w’igihugu ca Congo amenyesha ko kubera ko amatora vyaragaragaye ko atagishobotse kuba mu kwezi kwa Ruhuhuma, bahisemwo gufata ingingo bakongereza ico kiringo c’intwaro mfatakibanza, gushika mu kwezi kwa Myandagaro umwaka w’2015.